नालासोपारा ता, २३ :- नालासोपारा पश्चिम परिसरात दररोज वारंवार वीजपुरवठा खंडित होत आहे. दिवसातून किमान तीन ते चार वेळा वीजपुरवठा बंद होत आहे. वाढत्या उन्हाळ्याच्या उकाड्याने नागरिक त्रस्त असताना त्यात विजेचा लपंडाव सुरू आहे. याबाबत शिवसेना पदाधिकारी यांनी थेट महावितरण कार्यालय गाठत अधिकाऱ्यांना जाब विचारला. तसेच यावर तत्काळ तोडगा काढण्याची मागणी करण्यात आली. अतिरिक्त कार्यकारी अभियंता आलोक करंडे यांना निवेदन देण्यात आले. परिसरात दररोज वारंवार वीजपुरवठा खंडित होत आहे. जीर्ण आणि कमी दाबाच्या केबल, विजेची वाढती मागणी यामुळे हे प्रकार सातत्याने घडत आहेत. महावितरण, महापालिका प्रशासनाने एकत्रित याकरिता उपाययोजना करण्यात यावी, अशी मागणी शिवसेना पदाधिकारी यांनी केली.सतत खंडित होणारा वीजपुरवठा, महावितरण कार्यालयातून नागरिकांना मिळणारी उद्धट उत्तरे, वीज बिल थकले तर कनेक्शन कापण्याची धमकी अशा अनेक तक्रारी यावेळी मांडल्या. अधिकाऱ्यांनी पुढच्या तीन दिवसात इतर कर्मचाऱ्यांची व अधिकाऱ्यांची बैठक घेऊन अडचणी का येत आहे, हे समजून घेऊन परत संवाद साधणार आहेत. नागरिकांना येणाऱ्या समस्या सोडविण्यासाठी प्रयत्न करून त्या सोडवण्यासाठी प्रयत्न करणार असल्याचे आश्वासन महावितरणच्या अधिकाऱ्यांनी दिले. स्थानिक नागरिकांनी लोकप्रतिनिधी आणि प्रशासनाकडे वारंवार तक्रारी केल्या. मात्र मागील अनेक वर्षांपासून ही समस्या सुटलेली नाही. महावितरण विभागातील रिक्त पदे भूमिगत विद्युत वाहिनी, सामग्री इत्यादी सुविधा पुरविण्याची मागणी शिवसेनेच्या वतिने करण्यात आली.यावेळी शिवसेना महिला आघाडी शहर संघटक रूचिता नाईक, उपशहरप्रमुख महेश निकम, विभागप्रमुख दानिश करारी, विभागप्रमुख निलेश शिंदे, महिला विभाग संघटक जया गुप्ता, अमित नाईक उपस्थित होते.
